Бишкек, 10.02.25. /Кабар/. Өлкөнүн аймагында күйүүчү майды мыйзамсыз сатууга каршы рейд жүрүүдө. Бул тууралуу өзгөчө кырдаалдар министрлигинен билдиришти.
Маалыматка ылайык, ӨКМдин алдындагы Өрттү көзөмөлдөө кызматынын Чүй жана Талас облустары боюнча башкармалыгынын инспекторлору Жайыл, Москва жана Панфилов райондук өзгөчө кырдаалдар бөлүмдөрүнүн кызматкерлери менен бирге мыйзамсыз сакталган жана көчө боюнда башаламан сатылган күйүүчү-майлоочу майларды текшерүү рейди өткөрүлдү.
Рейддин жүрүшүндө Кара-Балта, Беловодск, Александровка жана Чалдовар айылдарында күйүүчү майлар мыйзамсыз сатылып аткан 9 түйүн аныкталды. Уруксаты жок сатуу менен алектенген адамдарга мындай аракеттер коопсуздукка каршы келээрин түшүндүрүп, эл көп чогулуучу коомдук жайларда, жол жээгинде сатууга болбой турганын эскертишти.
Эске салсак, өрт коопсуздук эрежелеринин бузулушунан өрттүн пайда болушун, ири материалдык чыгымдарды жана адам өмүрү үчүн олуттуу коркунучтарды жаратат.
"ӨКМ адистери күйүүчү майлар уруксат берилген атайы май куюучу жайларда гана сатылышы керектигин эскертет",-деп айтылат маалыматта.
