Бишкек, 28.04.26. /Кабар/. Саламаттык сактоо министри Дамир Осмонов АКШнын Юта штатынын Сенатынын төрагасы жана эл аралык гуманитардык уюмдардын өкүлдөрү менен жолугушту. Бул тууралуу аталган министрликтен билдиришти.
Ведомствонун маалыматына ылайык, Дамир Осмонов америкалык тарапка Кыргызстандын саламаттык сактоо системасын ырааттуу колдоосу жана биргелешкен гуманитардык жана медициналык демилгелерди ишке ашырууга кошкон салымы үчүн ыраазычылык айтты.
Саламаттык сактоо министрлиги жана Project C.U.R.E. уюму менен өнөктөштүктүн алкагында өлкөдөгү үч оорукана үчүн медициналык каражаттар салынган контейнерлерди жеткирүү каржыланды.
Ошондой эле MedGlobal уюму менен өнөктөштүктө былтыр Жалал-Абад шаарындагы жаңы төрөт үйү үчүн рентген, ультраүндүк жабдуу жана генераторлор алынган. Мындан тышкары кызматкерлер окутулган.
Юта штатынын Сенатынын өкүлдөрү эки тараптуу кызматташуунун жогорку потенциалын белгилеп, саламаттык сактоо, гуманитардык жардам, билим берүү жана тажрыйба алмашуу тармактарында өнөктөштүктү мындан ары өнүктүрүүгө даяр экенин белгилешти.
.The Stirling Foundation уюмунун Борбор Азия боюнча регионалдык директору Жози Макги Кыргызстандагы долбоорлорду улантуу жана жакынкы жылдары колдоону кеңейтүү ниетин ырастады.
