Бишкек, 23.09.26. /Кабар/. Кош бойлуулукка жоопкерчиликтүү даярдык көрүү, медициналык көзөмөл жана бала төрөлгөндөн кийинки туура кам көрүү анын ден соолугун сактоодо маанилүү роль ойнойт. Бул тууралуу Балдар дарыгерлеринин коомдук бирикмесинин президенти Шайырбек Сулайманов билдирди.
Анын айтымында, болочок наристенин ден соолугуна кам көрүү кош бойлуулукка чейин башталышы керек. Болочок ата-энелер ден соолугун текшертип, өнөкөт оорулар жана колдонуп жаткан дары-дармектер боюнча дарыгерден кеңеш алып, зарыл эмдөөлөрдүн бар-жогун тактап, тиешелүү текшерүүлөрдөн өтүшү керек.
Профессор аялдын кош бойлуулукка чейин жана кош бойлуу кезиндеги тамактануусуна өзгөчө көңүл буруу зарылдыгын белгиледи. Рациондо жашылча-жемиштер, дан азыктары, белокко бай азыктар жана сүт азыктары же алардын толук кандуу альтернативалары болушу керек.
Дарыгердин сунушу менен бала бүтүүдөн мурда жана кош бойлуулуктун алгачкы мезгилинде фолий кычкылын кабыл алуу түйүлдүктүн нерв түтүкчөсүнүн кемтиктеринин коркунучун азайтууга жардам берет.
Ошондой эле болочок ата-энелер тамеки, алкоголдук ичимдиктер жана психоактивдүү заттардан толук баш тартып, өз алдынча дарылануудан алыс болушу керек. Кош бойлуу аялды үзгүлтүксүз медициналык кароодон өткөрүү, анализдерди жана ультра-үндүү изилдөөдөн (УЗИ) өтүү эненин ден соолугун жана түйүлдүктүн өнүгүүсүн көзөмөлдөөгө мүмкүндүк берет.
Сулайманов тубаса ооруларды эрте аныктоодо пренаталдык диагностика өзгөчө маанилүү экенин белгиледи. Төрөттөн кийин баланын ден соолугун сактоодо эмчек эмизүү, улуттук эмдөө календарына ылайык эмдөө, туура тамактануу жана профилактикалык кароолор маанилүү.
Анын айтымында, дени сак баланын төрөлүшү үй-бүлө менен саламаттык сактоо системасынын биргелешкен жоопкерчилигинин жыйынтыгы болуп саналат.
