Бишкек, 01.04.26. /Кабар/. Ысык-Көл облусунун аймагындагы стратегиялык жол курулуштары туристтик сезонго жана эл аралык иш-чараларга карата тездетилүүдө. Бул тууралуу Транспорт жана коммуникациялар министрлигинин Автомобиль жолдору башкармалыгынын башчысы Асылбек Чойбеков "Кабар" агенттигинин "Элден собол" программасында билдирди.
Анын айтымында, негизги долбоорлордун бири Чолпон-Атадагы айланып өтүүчү 16 чакырымдык айланма жолду куруу. Бул процессти мүмкүн болушунча тездетүү үчүн долбоорлоо жана курулуш иштери параллелдүү түрдө жүргүзүлүүдө.
"Жолдун айрым бөлүктөрүндө археологиялык табылгалар табылды. Учурда Маданият, маалымат, спорт жана жаштар саясаты министрлиги менен биргеликте тарыхый-маданий мурас объектилерин кылдаттык менен көчүрүү боюнча иштер жүрүп жатат. Калган бөлүктөрүндө толук масштабдуу жол курулушу кадимки режимде уланууда", — деп белгиледи Чойбеков.
Жол куруучуларга айланма жолду ушул жылдын сентябрь айына чейин бүтүрүү милдети жүктөлдү. Ошондой эле Кырчын жайлоосуна баруучу жол инфраструктурасын өнүктүрүүгө олуттуу көңүл бурулду.
"Узундугу 33 чакырым болгон эки унаа жолу толугу менен кайра курулат. Жайлоого барчу кошумча 13 чакырымдык жол дээрлик даяр", — деди ал.
Бул маршруттардын өнүгүшү курорттук шаардын борбордук көчөлөрүндөгү тыгындарды азайтып, массалык иш-чаралар өтүүчү жайларга ыңгайлуу жетүүнү камсыз кылат.
