Бишкек 22.05.25. /Кабар/. Биоартүрдүүлүктүн эл аралык күнүнө карата бүгүн Бишкекте экологиялык туризмди өнүктүрүү боюнча жергиликтүү жамааттар үчүн колдонмонун бет ачары өттү.
“Кабар” агенттигинде өткөн маалымат жыйынында эколог Евгения Постнова билдиргендей, жапайы жаныбарлар, талаалар, токойлор жана бардык жаратылыш абдан маанилүү жана аларды өнүктүрүүгө, коргоого муктаж.
“Ооба, албетте, экономика маанилүү, бирок бардык экономиканын өзөгүндө жаратылыш турат. Кыргызстандын туризмди өнүктүрүү үчүн чоң потенциалы бар. Бирок, бул өнүгүү табигый мурастарыбызды сактап калууга жана көп учурда жоголгонду калыбына келтирүүгө мүмкүндүк бере тургандай жол менен болушу абдан маанилүү. Айлана-чөйрөнү жана биологиялык ар түрдүүлүктү коргоону эске алуу менен туризмди өнүктүрүү маанилүү”, - деди ал.
Эколог белгилегендей, “Фотожурналисттер союзу” коомдук бирикмеси жана “Акмена” коомдук уюму “Экотуризм” түшүнүгүнүн маңызын түшүндүрүү менен гана чектелбестен, аны кантип уюштурууну иш жүзүндө көрсөтүүгө багытталган колдонмону түзүүнүн үстүндө иштешкен.
“Белгилей кетүүчү нерсе, колдонмо эки тилде жеткиликтүү. Китеп айрыкча ишкерлерге жана бизнесмен болууну көздөгөн адамдарга тиешелүү. Колдонмодо туруктуу туризм боюнча эл аралык тажрыйба жана биоартүрдүүлүктүн негизги аймактарында экотуризмди өнүктүрүү боюнча сунуштар камтылган”,- дейт Постнова.
Эколог жана фотожурналист Владислав Ушаковдун айтымында, Кыргызстан 2022-жылдан бери тоо экосистемаларын коргоого өзгөчө көңүл буруп келет. Ал эми жаратылышты сактоочу жана калыбына келтирүүчү туризм өлкөнүн табигый мурастары топтолгон негизги биоартүрдүүлүк аймактарында абдан актуалдуу жана маанилүү.
Ар бир аймак уникалдуу ландшафттардын, флоранын жана фаунанын, ошондой эле тарыхый жана маданий кооздуктардын айкалышы. Алар ошондой эле коркунуч алдында турган түрлөрдү же экосистемаларды сактоо үчүн маанилүү болуп саналат.
Колдонмо төмөнкү суроолорго жоопторду камтыйт:
- Экотуризм деген эмне? Экотуризмдин принциптери жана түрлөрү.
- Жаратылышты кантип туристтерден жана туристтер үчүн сактап калуу керек?
- Экологиялык туризм инфраструктурасы.
- Экотуризм продуктусун түзүү жана экотуризмдеги менеджмент.
- Китепте ошондой эле тиркемелер, библиография жана пайдалуу шилтемелер бар.
“Бул колдонмо экологдор үчүн гана эмес, туризм тармагынын кызматкерлери, мамлекеттик органдар, жергиликтүү өз алдынча башкаруу органдары, мугалимдер жана студенттер үчүн да пайдалуу болот”, - деп белгилешти маалымат жыйынынын катышуучулары.
Ушаков бул китеп бардык адамдарга жаратылышка жана айлана-чөйрөгө болгон жоопкерчиликти жана этият мамиле кылууну эскертип, алардын жаратылышка тийгизген таасирин азайтуу максатында жазылганын айтты.
Китеп миң нускада басылып чыгып, туризм менен алектенген бардык жергиликтүү жарандарга бекер таратылат.
