Бишкек, 12.02.25. /Кабар/. Экономика жана коммерция министрлиги, Суу ресурстары, айыл чарба жана кайра иштетүүчү өнөр жай министрлиги, Монополияга каршы жөнгө салуу кызматы жана Ун өндүрүүчүлөр ассоциациясынын ортосунда кызматташуу жөнүндө келишимге кол коюлду.
Ведомстводон билдиришкендей, келишим өлкөнүн азык-түлүк коопсуздугун камсыздоого, элди сапаттуу ун жана мал чарбачылыгы үчүн тоют менен үзгүлтүксүз камсыздоого багытталган.
Ошондой эле ал КР министрлер кабинетинин ун чыгаруучу ишканалар үчүн убактылуу жеңилдик берүү боюнча токтомун эске алуу менен, калк үчүн социалдык маанилүү товарлардын баасын турукташтырууга өбөлгө түзөт.
Экономика министри Бакыт Сыдыков кол коюлган келишимди ишке ашыруунун маанилүүлүгүн баса белгилеп, ун жана нан азыктары негизги азык-түлүк продукциялары экенин, алардын калк үчүн жеткиликтүүлүгүн камсыздоо мамлекеттик саясаттын артыкчылыктуу багыты экенин билдирди.
Ошондой эле Ун өндүрүүчүлөр ассоциациясынын президенти 2024-жылдын аягында министрлер кабинетинин дан жана унга кошумча нарк салыгын (КНС) нөлгө түшүрүү мөөнөтүн узартуу боюнча токтомунун натыйжалуулугун белгиледи.
Анын айтымында, бул чечим тармакка оң таасирин тийгизип, жергиликтүү ун өндүрүүчүлөргө өлкөнү өз дан продукциясы менен камсыздоого шарт түзөт жана импортко болгон көз карандылыкты азайтат.
