Бишкек, 08.09.26. /Кабар/. Бүгүн, 8-сентябрда саат 14:00дө Гапар Айтиев атындагы Кыргыз улуттук көркөм сүрөт музейинде "Мурас кайра жаралганда" аттуу көргөзмөнүн расмий ачылышы өттү.
Маданий долбоор кыргыздын салттуу кол өнөрчүлүгүн сактоого, өнүктүрүүгө жана заманбап өңүттө таанытууга арналган. Көргөзмөгө шырдактар, кийизден жасалган буюмдар, декоративдик-колдонмо искусствонун чыгармалары жана Кыргызстандын ар кайсы аймактарынан келген чеберлер тарабынан жасалган улуттук мурастын заманбап үлгүлөрү коюлат.
Көргөзмө салттуу кол өнөрчүлүктү өнүгүп, заманбап шартта жаңыча өң алып жаткан маданияттын жандуу бөлүгү катары көрсөтөт. Анда уникалдуу ыкмаларды, оймо-чиймелерди жана муундан муунга өтүп келе жаткан тажрыйбаларды сактап калган чеберлердин эмгегине өзгөчө көңүл бурулат.
Расмий ачылыштын алкагында Кыргызстандын ар кайсы аймактарынан келген уз-чеберлердин башын бириктирген "Жылдын шырдакчысы" V республикалык сынагы өтөт. Сынактын максаты — салттуу кол өнөрчүлүктүн чеберлерин колдоо, кыргыз шырдагын жасоонун уникалдуу технологиясына көңүл буруу жана маданий мурастын маанилүү бөлүгүн сактоого салым кошуу.
Ачылыш аземинин программасында жандуу мастер-класстар, музыкалык программа жана этно-фуршет да уюштурулат. Көргөзмө 2026-жылдын 20-сентябрына чейин уланат.
"Кабар" агенттигинин сүрөтчүсү улуттук баалуулукту даңазалаган иш-чараны сүрөттөр аркылуу баяндайт.
