Бишкек, 07.02.25. /Кабар/. Өлкөнүн аймактарында азык-түлүк жарманкелери уюштурулуп, Караколдо социалдык аянтча ачылды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, жарманкелер өлкөдөгү тамак-аш коопсуздугун сактоо, социалдык маанидеги айыл чарба товарларына болгон бааны туруктуу кармоо жана жарандарды арзан баадагы азык-түлүк менен камсыз кылуу максатында уюштурулууда.
Учурда жарманке Сузак, Өзгөн, Ноокен, Алай, Кара-Кулжа райондорунда өтүп жатат. Мисалы, уй эти – 550-600 сомдон, ал эми кой эти 600-630 сомдон сатылууда.
Ошондой эле министрлик тарабынан айрым аймактардагы базарларда уюштурулган социалдык аянтчалар да иштеп жатат. Бүгүн биринчи жолу Каракол шаарында социалдык аянтча уюштурулду. Мында эттин баасы салыштырмалуу арзан баада сатылат. Мисалы, уй эти 550, кой эти – 600 сом болууда.
