Чолпон-Ата, 07.08.26. /Кабар/. Өзбекстан Евразия экономикалык биримдиги (ЕАЭБ) менен санариптик соода, өнөр жай кооперациясы, "жашыл" технологиялар, эмгек мобилдүүлүгү жана туризм багыттарындагы кызматташтыкты кеңейтүүнү сунуштады. Бул тууралуу Өзбекстандын премьер-министри Абдулла Арипов Чолпон-Ата шаарында өтүп жаткан Евразия өкмөттөр аралык кеңештин кеңейтилген курамдагы жыйынында билдирди.
Ал Казакстанга ЕАЭБдеги төрагалыгынын алкагындагы иши жана жасалма интеллектти өнүктүрүү, транспорттук байланыштарды чыңдоо, өнөр жай кооперациясын кеңейтүү жана сооданы либералдаштыруу боюнча демилгелери үчүн жогору баа берди.
Ариповдун айтымында, Өзбекстан үчүн ЕАЭБге мүчө мамлекеттер менен практикалык кызматташтыкты кеңейтүү тышкы экономикалык саясаттын негизги багыттарынын бири бойдон калууда. Учурда кызматташтык комплекстүү экономикалык өнөктөштүктүн жаңы деңгээлине чыгып, логистикалык байланыштар, энергетика, кызмат көрсөтүү жана санариптик экономика тармактарында жаңы мүмкүнчүлүктөр ачылууда.
Ал белгилегендей, Өзбекстан Евразия экономикалык комиссиясы менен биргеликте үч жылдык биргелешкен иш-чаралар планын ишке ашырууну аяктап жатат. Анын алкагында Өзбекстандын жана ЕАЭБдин техникалык жөнгө салуу системаларын жакындатуу боюнча жол картасы кабыл алынган.
Ошондой эле ушул күздө Ташкентте Өзбекстан менен Евразия экономикалык комиссиясынын биргелешкен жумушчу тобунун кезектеги жыйынын өткөрүп, кызматташтыктын кийинки этабы боюнча жаңы пландарды талкуулоо пландалууда.
Мындан тышкары, Евразия өнүктүрүү банкы менен биргеликте өнөр жай, энергетика жана логистика тармактарындагы долбоорлордун портфели түзүлгөн.
Ошондой эле Өзбекстандын премьер-министри кызматташтыкты өнүктүрүү боюнча бир катар конкреттүү сунуштарды айтты.
Алардын биринчиси - тоскоолдуксуз соода жүргүзүү үчүн бирдиктүү санариптик мейкиндик түзүү. Анын айтымында, концепциядан конкреттүү пилоттук долбоорлорго өтүп, санариптик өз ара аракеттенүүнү, көзөмөлдөө органдарынын маалымат алмашуусун жана электрондук документтерди өз ара таанууну камсыз кылуу зарыл.
Ошондой эле негизги транспорттук каттамдардын биринде акылдуу транспорттук-бажылык коридорду ишке киргизүү сунушталды.
Экинчи багыт катары өнөр жай кооперациясын жаңы деңгээлге чыгаруу сунушталды. Арипов "Иннопром" көргөзмөсүнүн алкагында жетишилген макулдашуулардын негизинде биргелешкен кооперация программасын даярдоону сунуштады.
Анын айтымында, документке келечектүү долбоорлордун, өндүрүштүк аянтчалардын жана өнөктөштөрдүн тизмеси, ошондой эле биргелешкен демилгелерди каржылоонун конкреттүү булактары киргизилиши керек.
"Өзбекстан кооперация боюнча долбоордук кеңсе түзүп, Евразия экономикалык комиссиясы жана өнүктүрүү институттары менен тыгыз кызматташууга даяр", - деди Арипов.
Үчүнчү багыт - өнөр жайды "жашыл" трансформациялоо боюнча биргелешкен программаны кабыл алуу. Бул программа энергиянын натыйжалуулугун жогорулатууга жана таза технологияларды киргизүүгө багытталмакчы.
Ариповдун айтымында, биринчи этапта энергияны көп талап кылган тармактардагы долбоорлордун портфелин түзүп, анын ичинде энергия керектөөнү башкарууда жасалма интеллектке негизделген чечимдерди киргизүү зарыл.
Төртүнчү сунуш уюшкан эмгек мобилдүүлүгүнө байланыштуу болду. Өзбекстан улуттук жумуш менен камсыз кылуу боюнча санариптик платформасын ЕАЭБдин эмгек мобилдүүлүгүнө байланышкан системасы менен интеграциялоону сунуштады.
"Бул демилгени ишке киргизүү боюнча макулдашылган ыкмаларды иштеп чыгуу үчүн Евразия экономикалык комиссиясы менен консультацияларды өткөрүүгө даярбыз", - деди Өзбекстандын өкмөт башчысы.
Бешинчи багыт катары туризм тармагындагы кызматташтыкты кеңейтүү сунушталды. Арипов Чолпон-Атада өтүп жаткан жыйын Борбор Азиянын жалпы туристтик потенциалын ачык көрсөтүп турганын белгиледи.
Ал "Борбор Азиянын туристтик шакеги" демилгесине бардык кызыкдар тараптарды кошулууга чакырды. Анын алкагында биргелешкен трансчек аралык туристтик маршруттарды түзүү, иш-чаралардын бирдиктүү календарын иштеп чыгуу, пакеттик турларды уюштуруу жана аларды ири санариптик платформаларда илгерилетүү сунушталууда.
Арипов аталган багыттардын бардыгын Өзбекстандын өкмөтү менен Евразия экономикалык комиссиясынын жаңы биргелешкен иш-чаралар планына киргизүүнү сунуштады.
Анын айтымында, бул демилгелерди ишке ашыруу мамлекеттердин өз ара пайдалуу өнөктөштүгүн чыңдоого жана туруктуу өнүгүүсүнө өбөлгө түзөт.
Айпери Сатыбалдиева, "Кабар"
