Бишкек, 08.04.26. /Кабар/. Бишкекте Жал кичи районундагы көп кабаттуу үйдөн кулап каза болгон келиндин ата-энеси менен Ички иштер министрлигинин жетекчилиги жолукту. Бул тууралуу аталган министрликтен билдиришти.
Ведомствонун маалыматына ылайык, анда маркумдун туугандарына жүргүзүлүп жаткан тергөө иш-чаралары жөнүндө кенен маалымат берилди. Суроолоруна түшүндүрмөлөр айтылды.
Каза тапкан келиндин ата-энеси тергөө органдарынын аракеттерине дооматтары жок экенин билдиришти.
Белгиленгендей, аталган кылмыш иши ички иштер министринин жеке көзөмөлүндө турат.
Эске салсак, 4-апрелде Жал кичи районунда аял эки кызы менен 6-кабаттан кулаган. Алган жаракаттарынан улам келин окуя болгон жерде, бир кызы ооруканада каза тапкан. Ал эми 2022-жылы туулган экинчи кызы оор абалда Бишкек шаардык тез жардам балдар клиникалык ооруканасынын жандандыруу бөлүмүнө түшкөн. Буга байланыштуу тергөө иштери башталып, кылмыш иши козголгон.
6-апрелде Ленин райондук сотунун чечими менен келиндин жолдошу 4-июнга чейин камакка алынган.
