Бишкек, 03.03.25. /Кабар/. Өлкөдө браконьерлик менен күрөшүүдө кызмат өтөп, өз өмүрүн тобокелге салган корукчулардын тайманбас эрдиги бааланышы керек. Мындай пикирин “Кабар” маалымат агенттигине Илбирстерди коргоо фондунун директору Кубанычбек Жумабай уулу билдирди.
Анын айтымында, 3-март - Бүткүл дүйнөлүк жаратылышты коргоо күнүн утурлай корукчулардын эмгегин даңазалоо максатында жыл сайын мыкты делген корукчуларды сыйлоо аземи өткөрүлүп келет.
“11 жыл ичинде жалпы 170тен ашуун корукчу сыйланды. Корукчулардын жумушу абдан катаал. Суукка, ысыкка карабай бийик-бийик чокуларда, шар аккан сууларда өздөрүнүн өмүрүн тобокелге салып өлкөм үчүн деп жан үрөп кызмат өтөп келишет. Аларга аз да болсо, дем болсун деп биз ушул сыйлыкты уюштурганбыз. Алдыда буюрса мындан да жакшы сыйлыктар берилет”,-деди ал.
