Бишкек, 25.03.26. /Кабар/. Бүгүн Бишкек шаарынын билим берүү уюмдарында жашылдандыруу акциясы өткөрүлдү. Бул тууралуу мэриядан билдиришти.
Маалыматка ылайык, иш-чара №108 орто мектепте, №59 жана №7 бала бакчада окуучулардын жана ата-энелердин катышуусунда уюштурулду.
Акциянын алкагында көрктөндүрүү жана экологиялык абалды жакшыртуу үчүн жалпы 60 түп кайың жана 300 даана тосмо көчөт отургузулду.
Муниципалитеттен белгилешкендей, мындай иш-чаралар өсүп келе жаткан муунду айлана-чөйрөгө аяр мамиле кылууга тарбиялоого өбөлгө түзөт, ошондой эле шаар аймагын жашылдандырууга багытталган.
