Бишкек, 10.11.26. /Кабар/. Бишкекте Илим күнүнө карата "Кыргыз Республикасынын жашыл энергетикасы: илимди, инновацияларды жана инвестицияларды өнүктүрүү" аттуу форум өттү.
Иш-чараны Илим, жогорку билим берүү жана инновациялар министрлиги уюштуруп, ага мамлекеттик органдардын, илимий жана билим берүү мекемелеринин, бизнес жана стартап-коомчулугунун өкүлдөрү катышты.
Министрликтен билдиришкендей, форумда кайра жаралуучу энергия булактарын өнүктүрүү, күн энергетикасына жаңы технологияларды киргизүү, квалификациялуу кадрларды даярдоо жана жашыл экономикага инвестиция тартуу маселелери талкууланды.
Ошондой эле жаш окумуштуулар жана инноваторлор конкурсунун жеңүүчүлөрү сыйланып, InnovTech 2026 инновациялык технологиялар көргөзмөсү уюштурулду. Анда заманбап технологиялык чечимдер жана илимий иштелмелер көрсөтүлдү.
