Бишкек, 03.05.25 /Кабар/. Улуу Ата Мекендик согуштагы Жеңиштин 80 жылдыгын белгилөөнүн алкагында Бишкекте бир катар иш-чаралар өткөрүлөрүн борбор калаанын мэриясы билдирди.
Маалыматка ылайык, 8-майда саат 10:00дөн 12:00гө чейин Ала-Тоо аянтында Улуу Ата Мекендик согуштагы Жеңиштин 80 жылдыгына арналган салтанаттуу аскердик парад болот. Парадга КР Куралдуу күчтөрүнүн аскер кызматкерлери, ошондой эле өлкөнүн башка күч түзүмдөрүнүн өкүлдөрү катышат. Парадга 120дан ашык аскердик жана атайын техника, анын ичинде оор бронетехника, артиллерия, абадан коргонуу системалары жана авиация катышат. Жеңиш парадынын техникалык бөлүгүндө республикалык бюджеттин эсебинен сатылып алынган заманбап техникалар коюлат. Параддын аба бөлүгүнө Кыргыз Республикасынын жана Россия Федерациясынын Куралдуу күчтөрүнүн авиациясы катышат.
Ошондой эле 8-майда саат 16:00дөн баштап Фрунзе көчөсү менен Шопоков көчөсүнөн Ибраимов көчөсүнө чейин шаар тургундары аскердик техниканын көргөзмөсүн көрө алышат.
Ал эми, 9-майда саат 10:00дө Жеңиш аянтында Түбөлүк отко гүл коюу менен эскерүү кечеси өтөт. Ошондой эле саат 14:00гө чейин солдат боткосу жана майрамдык концерт болот.
9-майда саат 09:00дө “Өлбөс полк” аскердик-патриоттук акциясы Д.Асанов атындагы парктан Жукеев-Пудовкина/Ибраимов көчөлөрү аркылуу Жеңиш аянтындагы “Өчпөс от” мемориалына чейин кыймылын баштайт. Буга байланыштуу жол жарым-жартылай жабылат.
Мындан тышкары, 9-майда Улуу Ата Мекендик согуштагы Жеңиштин 80 жылдыгына карата саат 17:00дөн 22:00гө чейин Ала-Тоо аянтында кыргыз эстрада жылдыздарынын жана Россиянын белгилүү артисттеринин катышуусунда «Жеңиш ырлары» аттуу масштабдуу майрамдык концерт өтөт.
Концерттик программанын алкагында коноктор Улуу Ата Мекендик согуштун хроникасы менен видео ырааттуулугу менен толукталган бай маданий оюн-зоок көрсөтүшөт.
Кеңири масштабдагы концертти Бишкек мэриясы министрлер кабинетинин тапшырмасы жана «Жеңиш 9/45» патриоттук кыймылынын көмөгү менен «Евразия» коммерциялык эмес уюму менен биргеликте уюштурган.
“Түштөн баштап Ала-Тоо аянтында кыргыз жана орус элдеринин эрдигине арналган интерактивдүү аянтчалар ачылат: курал-жарактардын, кийимдердин, аскердик кийимдердин, тиричилик буюмдарынын жана баатырларыбыздын эс алуусунун көргөзмөсү. Концерттин соңунда Бишкектин асманы дрондун чоң шоусу менен жарыктанат. Миңдеген жарыктар, жарыктын жана технологиянын хореографиясы - өткөндүн эрдигине ыраазы болгон жаңы доордун символу катары”,-деп айтылат маалыматта.
