Бишкек, 27.01.25. /Кабар/. Россиянын мектептеринде кыргызстандык мигранттардын балдары туш болгон көйгөйлөр талкууланды. Бул маселе Билим берүү жана илим министри Догдуркүл Кендирбаеванын Россияга болгон расмий иш сапарында, РФнын агартуу министри Сергей Кравцов менен жолугушуусунда көтөрүлдү.
Ведомстводон билдиришкендей, эки тараптуу жолугушууда билим берүү тармагындагы кызматташтыктын негизги маселелери талкууланып, "Евразия лицейи" мектептерин колдоого өзгөчө көңүл бурулду.
Ошондой эле профилдик класстарды каржылоо жана окутуунун сапатын жогорулатууга мүмкүндүк бере турган заманбап окуу китептери менен камсыз кылуу боюнча макулдашылды.
Муну менен катар Россияда кыргызстандык мигранттардын балдарын окутуу маселеси көтөрүлүп, каттоосу же жашап турууга уруксаты жок жарандар мектептерге кирүүдөгү тоскоолдуктар, ошондой эле орус тилин билүү боюнча милдеттүү тестирлөөгө байланыштуу кыйынчылыктар талкууланды.
Белгиленгендей, аталган маселени чечүү үчүн Башкыр педагогикалык университети менен биргеликте орус тили боюнча онлайн курстарды түзүү сунушталды.
Иш сапардын дагы бир маанилүү натыйжасы россиялык "Просвещение" басмасынын окуу китептерин Кыргызстандын билим берүү стандарттарына ылайыкташтыруу үчүн жумушчу топ түзүү жөнүндө макулдашуу болду.
Мындан тышкары, министр Догдуркүл Кендирбаева Москванын № 1502 "Энергия" балдар мектебине жана анын "Гамма" инженердик корпусуна барып, окуучуларды кесипке чейин даярдоо ыкмалары менен таанышып, алардын тажрыйбасын Кыргызстандын билим берүү мекемелеринде колдонуу мерчемделди.
«Иш сапар Кыргызстан менен Россиянын ортосундагы билим берүүнүн байланыштарын чыңдоонун, ошондой эле кыргызстандык мектеп окуучуларына жеткиликтүү жана сапаттуу шарттарды түзүүнүн жаңы перспективаларын ачты»,-деп айтылат билдирүүдө.
