Бишкек, 12.05.25. /Кабар/. Күн мурун Ош улуттук драма театрында улуу жазуучу Чыңгыз Айтматовдун чыгармасынын негизинде сахналаштырылган “Раймалы менен Бегимай” аттуу этно-мюзикли көрүүчүлөргө тартууланды.
Президенттин аймактагы өкүлчүлүгүнөн билдиришкендей, маданий иш-чарага президенттин Ош облусундагы ыйгарым укуктуу өкүлү Элчибек Жантаев жана жергиликтүү бийлик өкүлдөрү катышты.
Облус жетекчиси Токтогул Сатылганов атындагы Кыргыз Улуттук филармониясынын чыгармачыл жамаатын куттуктап, ыраазычылык баракчасын жана Кыргыз Улуттук филармониясынын башкы директору Кыргызбай Осмоновго “Ош облусунун ардактуу атуулу” наамын тапшырды.
Белгилей кетсек, аталган чыгармада — сүйүү, искусство жана адамдык сезимдердин бийик баалуулуктары терең чагылдырган. Раймалы менен Бегимайдын образдары аркылуу сүйүүнүн түбөлүктүүлүгү жана коомдук тоскоолдуктарга каршы адамдык күрөш көрсөтүлгөн.
Ошондой эле, чыгарма көрүүчүлөрдү адамдык тагдырлар, ички дүйнө жана коомдук чектөөлөр ортосунда ой жүгүртүп, терең баалоого чакырат. Ага кошо улуттук маданиятыбызды, салт-санаабызды жана музыкалык мурастарыбызды чагылдырат.
Этно-мюзиклдин автору жана долбоордун жетекчиси — Кыргыз Республикасынын Эл артисти Кыргызбай Осмонов. Либреттону акын Аалы Туткучев жазган. Музыкалык чыгармалардын авторлору — Кыргыз Республикасынын Эл артисти Рысбек Жумакунов баштаган бир катар белгилүү композиторлор.
Эске салсак, “Раймалы жана Бегимай” этно-мюзикли Ош шаарында дагы үч күн бою сахналаштырылып, көрүүчүлөргө тартууланат.
