Бишкек, 18.06.25. /Кабар/. Бүгүн Кара-Суу районуна караштуу Папан айыл аймагында үч көчө асфальтталып, колдонууга берилди. Бул тууралуу президенттин Ош облусундагы өкүлчүлүгүнөн билдиришти.
Ачылыш аземине президенттин Ош облусундагы өкүлү Элчибек Жантаев, район акими жана жергиликтүү тургундар катышты.
Биринчиси, – Алчалуу айылындагы Таштанов Абдыманап атындагы ички көчө. Жолдун жалпы узундугу 3 118 метр, туурасы 4,5 метр. Бул иштер май айында башталып, республикалык бюджеттен 22 млн 150 миң сом каражат бөлүнгөн.
Экинчиси – "Папан Турук" коомдук фонду тарабынан Күндөлүк айылында жол асфальтталды. Жолдун узундугу 1,5 чакырым, асфальттын калыңдыгы 14 см болуп, жалпы сметалык баасы 16 млн 100 миң сомду түздү.
Үчүнчүсү – Ак-Терек – Папан – Кожо-Келен унаа жолунун 72–74-чакырым аралыгындагы 2 чакырым жол асфальтталып, пайдаланууга берилди. Бул долбоор Ош облустук өнүктүрүү фонду тарабынан каржыланып, жалпы 16 млн 297 миң 395 сом каражат жумшалды. Жолдун туурасы 6 метр, асфальттын калыңдыгы 13 см.
