Бишкек, 10.04.25. /Кабар/. "Манас" аэропортунун учуп-конуу тилкесин оңдоо иштери күз айларында аяктайт. Бул тууралуу президенттин басма сөз катчысы Аскат Алагөзов социалдык тармактагы баракчасына жазды.
Анын айтымында, учурда аэрпорттун учуп-конуу тилкесин оңдоо иштери кызуу жүрүүдө.
"Оңдоо иштери быйыл октябрь-ноябрда соңуна чыгат. Муну менен биринчиден, учуп-конуу тилкеси жаңыртылып, ага учактардын жумшак конуусуна шарт түзүлөт.
Экинчиден, ремонт иштеринин жүрүшүндө учактардын конуусуна белги бере турган эң заманбап жарыктандыргычтар орнотулат.
Бул өз кезегинде учурда аба-ырайынын начарлоосунан учактар коно албай калган учурларды дээрлик жокко чыгарат.
Мисалы, азыркыдай бир аз туман түшсө башка аэрпортко кетирүү маселеси жаралбайт.
Кыскасын айтканда, аэропортубуздун учуп-конуу тилкеси эң жогорку талаптагы технологиялык жабдыктар менен жабдылып, замандын талабына шайкеш келет", - деди ал.
Алагөзов кийинки жылы "Ош" эл аралык аэропортунда дагы ушундай эле жумуштар аткарыларын белгилеп, курулуш иштери "Манас" ААК өздөрү тапкан каражаттын эсебинен жүргүзүлүп жатканын кошумчалады.
