Бишкек, 29.04.26. /Кабар/. Майрам күндөрүнө карата Бишкек автобекетинде каттамга чыккан унаалардын саны көбөйөт. Бул тууралуу мэриядан билдиришти.
Маалыматка ылайык, иш күндөрү Ысык-Көл жана Нарын багыттарына 100гө чукул унаа чыкса, майрам күндөрү бул көрсөткүч 2 эсе өсөт.
Бишкек шаарындагы автобекет эртең мененки саат 07:00дөн кечки 23:30га чейин иштейт.
Күндүзгү убакыт 07:00дөн 19:00гө чейин Нарын жана Ысык-Көл багыттарына негизинен кичи автобустар каттайт.
Ал эми кечки 21:00дөн 23:30га чейин аталган багыттар боюнча автобустардын каттамдары уюштурулуп, Ысык-Көл облусуна - 5, Нарын облусуна - 1 автобус каттайт.
Ошондой эле Алматы, Тюмень, Кашкар жана Артуш эл аралык каттамдары туруктуу иш алып барууда.
Мындан тышкары, батыш багытын тейлеген Ак-Кула автобекетинде Талас облусуна жана Ташкент, Жизак эл аралык автобус каттамдары иштөөдө.
Белгиленгендей, сезондук каттамдар каралды. 15-майдан 15-октябрга чейин Ысык-Көл, Талас, Ош, Жалал-Абад жана Баткен багыттары боюнча кичи автобус каттамдары да ишке киргизилет.
