Бишкек, 24.01.25. /Кабар/. Президент Садыр Жапаров “Террористтик ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө” Кыргыз Республикасынын мыйзамына өзгөртүүлөрдү киргизүү тууралуу” КР мыйзамына кол койду.
Мыйзам 2024-жылдын 12-декабрында Жогорку Кеңеш тарабынан кабыл алынган.
Мыйзамдын максаты “Террористтик ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө” Кыргыз Республикасынын мыйзамында каралган натыйжалуу иштеп жаткан механизмдерди колдонуу менен уюшкан топторду же кылмыштуу коомдоштуктарды каржылоого каршы аракеттенүүнүн укуктук негиздерин түзүү жана натыйжалуулугун жогорулатуу болуп саналат.
Мыйзам менен “Террористтик ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө” КР мыйзамына төмөнкүдөй өзгөртүүлөрдү киргизүү сунушталууда:
– жогоруда көрсөтүлгөн мыйзамдын аталышындагы жана бүткүл тексти боюнча “террористтик же экстремисттик ишти, массалык кыргын салуучу куралды таратууну каржылоо” деген сөздөрдү “кылмыштуу ишти каржылоо” деген сөздөргө алмаштыруу;
– укук коргоо органдары жана улуттук коопсуздук органдары тарабынан кылмыштуу ишке тиешеси бар бардык финансылык жагдайларды финансылык териштирүүнү жүргүзүүнүн милдеттүүлүгүн белгилөө;
– Кыргыз Республикасынын укук коргоо, улуттук коопсуздук, прокуратура органдары менен финансылык чалгындоо органынын ортосунда маалымат алмашууну кылмыш иштер боюнча тергөө (сотко чейинки өндүрүш) стадиясында гана эмес, изин суутпай издөө ишинин стадиясында да жүргүзүү;
– Санкциялык тизмекке киргизилген жактарга таандык болгон кыймылсыз жана кыймылдуу мүлк, интеллектуалдык менчик объекттери (ойлоп табуулар, пайдалуу моделдер, өнөр жай үлгүлөрү, товардык белгилер, тейлөө белгилери) менен бүтүмдөрдү мамлекеттик каттоо боюнча кызмат көрсөтүүгө тыюу салуу;
– максаттуу финансылык санкцияларды колдонуу боюнча милдеттенмелерди кыймылсыз жана кыймылдуу мүлк, интеллектуалдык менчик объекттери менен болгон бүтүмдөрдү мамлекеттик каттоону жүзөгө ашыруучу мамлекеттик органдарга жана мекемелерге жайылтуу;
– операцияларды (бүтүмдөрдү) токтотуп туруу боюнча чараларды актуалдаштыруу;
– юридикалык жактардын бенефициардык ээлеринин ачык-айкындыгын камсыз кылуу боюнча чаралар чет өлкөлүк юридикалык жактардын филиалдарына (өкүлчүлүктөрүнө) да жайылтылат;
– уюшкан топторду же кылмыштуу коомдоштуктарды, массалык кыргын салуучу куралды таратууну каржылоо учурунда финансылык мекемелер жана финансылык эмес категориядагы жактар шектүү операция жөнүндө билдирүүнү түзөт жана финансылык чалгындоо органына жөнөтөт.
