Бишкек, 07.09.26. /Кабар/. Бүгүн Бишкекте Кыргызстан менен Зимбабвенин ортосундагы эки тараптуу мамилелердин тарыхында алгачкы жолу тышкы саясий ведомстволор аралык саясий консультациялар өттү. Бул тууралуу Тышкы иштер министрлиги билдирди.
Ага кыргыз тараптан тышкы иштер министринин орун басары Кайрат Турсункулов, Зимбабве тараптан Тышкы иштер жана эл аралык соода министрлигинин туруктуу катчысы Альберт Чимбинди жетекчилик кылды.
Тараптар саясий диалогду чыңдоо, эки тараптуу мамилелерди өнүктүрүү жана практикалык кызматташтыкты кеңейтүү маселелерин талкуулашты.
Өзгөчө соода-экономикалык байланыштарды өнүктүрүүгө, геология, туризм жана санариптештирүү тармактарында тажрыйба алмашууга көңүл бурулду. Ошондой эле Кыргызстан менен Зимбабвенин 2027-2028-жылдарга БУУнун Коопсуздук кеңешинин туруктуу эмес мүчөлөрү болуп шайланышына байланыштуу Кеңештин алкагындагы кызматташтык маселелери каралды.
Жыйынтыгында тараптар саясий консультацияларды үзгүлтүксүз өткөрүүгө жана жетишилген макулдашууларды ишке ашыруу аркылуу кыргыз-зимбабве мамилелерине жаңы дем берүүгө кызыкдар экенин билдиришти.
