Бишкек, 08.04.25. /Кабар/. Кыргызстан менен Казакстандын театр чөйрөсүндө кызматташтыгы кеңейүүдө. Бул тууралуу Маданият, маалымат жана жаштар саясаты министрлигинен билдиришти.
Маалыматка ылайык, апрель айында театр ишмердүүлүгүн жана маданият менен чыгармачылык жаатындагы эл аралык кызматташтыкты өнүктүрүүнүн алкагында Касымалы Жантөшев атындагы Ысык-Көл облустук музыкалык драма театрынын директору У.М. Маратов Казакстандын бир катар театрлары менен кызматташуу жөнүндө меморандумга кол койду. Анын ичинде Астана акимчилигинин “Жастар театры” мамлекеттик мекемесинин, Сакен Сейфуллин атындагы Караганды облустук академиялык казак драма театрынын, Алматы шаарынын Маданият башкармалыгынын Мамлекеттик куурчак театры мекемеси бар.
Бул меморандумдар эки өлкөнүн маданий байланыштарын бекемдөөгө, чыгармачыл жамааттардын тажрыйба алмашуусуна, эл аралык театралдык фестивалдарды өткөрүүгө ошондой эле театр искусствосун өнүктүрүүгө багытталган. Ошондой эле, кызматташтыктын алкагында гастролдорду уюштуруу, мастер-класстарды өткөрүү, чыгармачылык алаканы бекемдөө жана кадрларды даярдоодо биргелешкен долбоорлорду ишке ашыруу пландалууда.
Мындай меморандумдар Кыргызстандын театр искусствосунун эл аралык деңгээлде таанылышына өбөлгө түзүп, жаштардын чыгармачылыгын колдоого жана улуттук маданиятты жайылтууга өбөлгө түзөт.
