Бишкек, 09.03.26. /Кабар/. Коррупцияга шектелип Республикалык кан борборунун мурдагы директору кармалды. Бул тууралуу УКМКдан билдиришти.
Маалыматка ылайык, аталган борбордун 2012-жылдан 2025-жылдын август айына чейин директору болгон 54 жаштагы К.Б.Б. 2020-жылы жеке менчик компаниянын жетекчиси менен алдын ала кылмыштуу бүтүмгө келип, бюджеттик каражаттарды өзгөчө ири өлчөмдө чыгарып кетүүнү көздөшкөн. Алар кымбат баалуу медициналык жабдууларды борборго орнотушкан.
Ошондой эле беш жыл бою реагенттерди жогорулатылган баада жеткирип турушкан. Ал эми каражаттын белгилүү бир бөлүгү директорго берилип турган.
Тергөөдө мурдагы директор жана жеткирүүчү компания мамлекетке 36 млн сом өлчөмүндө зыян келтиргени аныкталды.
Кылмыш ишинин алкагында Республикалык кан борборунун мурдагы директору УКМКнын тергөө абагына киргизилди. Ал эми жеке компаниянын жетекчисинин аракеттерине тергөөнүн жүрүшүндө укуктук баа берилери айтылды.
Аталган кылмыш иши боюнча коррупциялык схемага тиешеси бар башка кызмат адамдарын аныктоо максатында ыкчам-тергөө иш-чаралары улантылууда.
