Бишкек, 06.09.26. /Кабар/. VI Дүйнөлүк көчмөндөр оюндарынын алкагында өткөн көк бөрү боюнча мелдеште Тажикстандын командасы 4-орунду ээледи.
Күн мурун алар 3-орун үчүн мелдеште Россиянын курама командасына 3:0 эсебинде жеңилип калган.
Натыйжада 4-орунду ээлеген тажикстандык улакчыларга 1 млн сом байге берилди.
Мелдештин жыйынтыгында 1-орунду ээлеген Кыргызстандын командасы 5 млн сом, 2-орундагы Казакстан 3,1 млн сом, 3-орунду алган Россиянын командасы 2,5 млн сом байгеге ээ болду.
Белгилей кетсек, VI Дүйнөлүк көчмөндөр оюндары 2026-жылдын 31-августунан 6-сентябрына чейин Кыргызстанда өтүүдө. Ачылыш аземи 31-августта борбор калаадагы "Бишкек Арена" стадионунда орун алды. 1-сентябрдан 6-сентябрга чейин оюндар Ысык-Көл облусунда өткөрүлүп, ага 109 өлкөдөн 3000ден ашуун спортчу катышууда.
"Кабар" маалымат агенттиги VI Дүйнөлүк көчмөндөр оюндарынын Эл аралык маалыматтык өнөктөшү катары дүйнө көчмөн элдеринин мурасын сактоого жана даңазалоого багытталган ири этномаданий жана спорттук иш-чараны ыкчам жана көп тилдүү маалыматтык чагылдырууну камсыз кылат.
"Кабар" 1937-жылы негизделген Кыргызстандын алгачкы маалымат агенттиги. Агенттик кыргыз, орус, англис, араб, түрк жана кытай тилдеринде жаңылыктарды таратып, Кыргызстандагы жана Борбор Азиядагы маанилүү окуяларды чагылдырат.
