Бишкек, 25.06.26. /Бишкек/. Бишкек шаарында Шанхай кызматташтык уюмуна (ШКУ) мүчө мамлекеттердин ортосундагы инвестициялык жана ишкердик кызматташтыкты өнүктүрүүгө багытталган инвестициялык бизнес форум өз ишин жыйынтыктады. Бул туралуу Инвестициялар боюнча улуттук агенттиктен билдиришти.
Маалыматка ылайык, форум мамлекеттик органдардын, бизнес коомчулуктун, инвестициялык фонддордун, өнүктүрүү институттарынын, технологиялык компаниялардын жана ишкерлердин өкүлдөрүн бир аянтчага чогултту. Катышуучулар түз диалог жүргүзүп, тажрыйба алмашып, жаңы өнөктөштүк мүмкүнчүлүктөрүн аныкташты.
Агенттиктин башчысы Равшанбек Сабиров Бишкекте өткөн алгачкы Инвестициялык бизнес форумдун маанилүүлүгүн белгилеп, мындай аянтчалар диалогдон конкреттүү долбоорлорго өтүүгө шарт түзөрүн айтты.
“Бүгүнкү форум ишкердик коомчулук үчүн тажрыйба алмашууга, жаңы өнөктөштүктөрдү түзүүгө жана биргелешкен инвестициялык долбоорлорду талкуулоого маанилүү аянтча болду. Бишкекте өткөн ШКУнун инвестициялык бизнес форуму өлкөлөр ортосундагы экономикалык байланыштарды чыңдоого жана инвестициялык кызматташууну кеңейтүүгө жаңы мүмкүнчүлүктөрдү ачты”, - деп белгиледи Равшанбек Сабиров.
Форумдун жыйынтыгы боюнча ШКУга мүчө мамлекеттердин расмий өкүлдөрүнүн катышуусунда биргелешкен резолюцияга кол коюлду. Документ уюмдун алкагында инвестициялык форумдарды жана ишкердик иш-чараларды жыл сайын өткөрүү тажрыйбасын мындан ары өнүктүрүүнү бекемдейт.
Иш-чаранын жүрүшүндө жалпы суммасы 150 млн АКШ долларын түзгөн 12 инвестициялык жана соода келишимине кол коюлду. Алардын катарында меморандумдар жана макулдашуулар бар.
Белгилей кетсек, инвестициялык бизнес форумдун алкагында бүгүн, 25-июнда “Жаштык Аренада” ШКУ өлкөлөрүнүн өнөр жай-инвестициялык кызматташтык көргөзмөсү өтөт.
