Бишкек, 03.01.26. /Кабар/. Ысык-Ата районундагы мушташ фактысы боюнча жалпы 29 адам милицияга жеткирилди. Бул тууралуу Чүй облусунун ички иштер башкы башкармалыгынан билдиришти.
Милициянын маалыматы боюнча, 2-январда Ысык-Ата районунун айыл аймактарынын биринин борборунда ар кайсы айылдардын тургундары ортосунда мушташ болуп жаткандыгы тууралуу билдирүү келип түшкөн.
Ички иштер органдары тарабынан жүргүзүлгөн ыкчам-алдын алуу иш-чараларынын жүрүшүндө окуяга тиешеси бар бардык адамдар аныкталган. Жалпы 29 адам облустук милицияга тиешелүү тергөө амалдарын жүргүзүү үчүн жеткирилген.
Аталган факты боюнча Кылмыш-жаза кодексинин 280-беренеси (Бейбаштык) менен кылмыш иши козголду.
Тергөө иштеринин жүрүшүндө белгилүү болгондой, чатак айдоочулар ортосунда унаа токтотуучу жайга байланыштуу чыккан пикир келишпестик мушташка алып келген.
Кылмыш-жаза кодексинин 96-беренесине ылайык 11 адам кармалды. Мындан тышкары, коомдук тартипти бузгандыгы үчүн 18 адамга карата Укук бузуулар жөнүндө кодексинин 126-беренеси (Майда бейбаштык) менен протоколдор түзүлдү.
Тергөө иштери уланууда.
