Бишкек, 08.10.26. /Кабар/. Экономика жана бизнес тармагындагы эксперт Сергей Пономарев өкмөттүн аппараттык жыйынында жарыяланган Кыргызстандын экономикалык өнүгүүсүнүн жыйынтыктарына талдоо жүргүздү.
2026-жылдын биринчи тогуз айынын жыйынтыгы боюнча республикалык бюджет 22 миллиард сом профицит менен аткарылды. Мамлекеттик казынанын киреше бөлүгү 608 миллиард сомго жетти. Ошол эле учурда салык жана бажы төлөмдөрүн чогултуу планы ашыгы менен аткарылды.
"Чындыгында, бир нече жылдан бери салыктык да, бажылык да төлөмдөр ийгиликтүү жыйналып келе жатат. Бул суммалар жыл сайын жакшы эки орундуу темп менен өсүүдө. Экономиканын айрым секторлору, мисалы, курулуш бизнеси жигердүү өнүгүүдө. Тышкы соода жакшы өнүгүп жатат, агробизнес дагы ИДПнын структурасындагы өз үлүшүн көбөйтүүдө.
Бүгүн министрлер кабинетинин төрагасы Адылбек Касымалиев бюджеттин профицитти тууралуу айтып жатат — бул абдан сонун. Мындан бир нече жыл мурун кандай болгонун эстейли. Ар бир жолу башкы каржы документи мамлекеттин чыгашалары кирешеден, айталы, 20 миллиард сомго, ал тургай андан да көпкө ашып түшөт деген негизде каралчу. Ошол маалда жөлөк пулдар жана пенсиялар мизердүү болуп, атүгүл базалык муктаждыктарды да жапчу эмес. Башкача айтканда, бүгүн биз башка экономикага жана таптакыр башка киреше деңгээлине ээбиз.
Ошондуктан азыр биз масштабдуу курулуштарды, инфраструктуранын өнүгүшүн көрүп жатабыз, социалдык сектордо чоң милдеттер чечилүүдө. Кыргызстандын бюджети бир триллион сомдон ашып, акыркы алты жылда үч эседен ашык өстү. Бүгүн өкмөттө колдонулуп жаткан цифралар — реалдуу. Бүгүн бюджетти түзүүдө биз өнүгүү, мектептерди жана ооруканаларды курууга жаңы салымдар, экономикадагы амбициялуу милдеттер тууралуу айтып жатабыз. Ошондуктан, бул жагынан республиканын бийлиги жакшы көрсөткүчтөргө жетишти", — деп жыйынтыктады Сергей Пономарев.
