Бишкек, 09.11.26. /Кабар/. Бишкек шаарындагы Дайыр Асанов атындагы Жеңиш паркында быйылкы жылдагы акыркы веложүрүш өттү.
Мэриядан билдиришкендей, миңдей велосүйүүчүлөр менен бирге иш-чарага мэр Айбек Жунушалиев катышты. Анда алар 5,4 чакырым аралыкты басып өтүштү.
Веложүрүштүн мара сызыгы “Газпром — балдарга” дене тарбиялык-ден соолукту чыңдоо комплексинин алдында белгиленди.
Шаар жетекчисинин айтымында, учурда Бишкек шаарында 77 чакырым веложол курулган. Бирок толук кандуу велосипед инфраструктурасын түзүү үчүн дагы бир топ иштерди аткаруу зарыл.
