Бишкек, 02.09.26. /Кабар/. Бүгүн, 2-сентябрда “Ынтымак Ордодо” президент Садыр Жапаров менен Кыргызстанга расмий сапары менен келген Пакистандын премьер-министри Мухаммад Шахбаз Шарифтин расмий жолугушуу аземи болуп өттү.
Флагштокторго Кыргызстандын жана Пакистандын мамлекеттик желектери илинген.
Садыр Жапаров менен Мухаммад Шахбаз Шариф салам алышкандан кийин эки тараптын расмий делегация мүчөлөрү менен тааныштыруу болду.
Андан соң Кыргызстан менен Пакистандын мамлекеттик гимндери жаңырды.
Ошондой эле ардак кароолдун аскер кызматкерлери салтанаттуу жүрүш менен өттү.
Белгилей кетсек, Пакистандын премьер-министри Мухаммад Шахбаз Шариф Кыргызстанга расмий сапары менен 31-августта келген.
Мухаммад Шахбаз Шариф ШКУга мүчө мамлекеттердин башчыларынын кеңешинин кезектеги жыйынына, “ШКУ плюс” форматындагы жогорку деңгээлдеги жолугушууга жана VI Дүйнөлүк көчмөндөр оюндарынын салтанаттуу ачылыш аземине катышкан.
