Бишкек, 18.03.25. /Кабар/. Мамлекеттик бажы кызматынын төрагасы Алмаз Салиев кыргыз-тажик мамлекеттик чек арасындагы жакында эле ачылган "Кызыл-Бел" жана "Кайрагач" өткөрмө пункттарына барды.
Ведомстводон маалымдашкандай, 13-мартта өткөрмө пункттардын иши кайра жанданган учурдан тартып бажы органдарынын кызматкерлери штаттык режимде кызмат өтөшүүдө, ал эми маалыматтык системалар жана техникалык каражаттар үзгүлтүксүз иштеп жатат.
Өздүк курам менен жолугушуунун жүрүшүндө төрага Кыргызстан менен Тажикстандын ортосундагы соода жана маданий байланыштарды чыңдоо үчүн аталган өткөрүү пункттарынын стратегиялык маанисин, ошондой эле контролдоочу органдардын натыйжалуу ишинин маанилүүлүгүн белгиледи.
Эки өлкө ортосундагы товар жүгүртүүнү өнүктүрүү келечегин эске алуу менен инфраструктураны модернизациялоого, ташуучулар үчүн шарттарды жакшыртууга жана мамлекеттик кызмат көрсөтүүлөрдүн сапатын жогорулатууга өзгөчө көңүл бурулду.
Өткөрүү пункттарын эл аралык стандарттарга ылайык, реконструкциялоо боюнча сунуштарды иштеп чыгуу, автотранспорт каражаттары үчүн электрондук кезек аймактарын түзүү жана чек арадагы мамлекеттик көзөмөлдөө органдарынын кызматкерлери үчүн ыңгайлуу шарттарды түзүү тапшырылды.
