Бишкек, 21.04.25. /Кабар/. Баку шаарында Азербайжандын Маданият министрлигинин чакыруусу менен "Коркут Ата" спектакли тартууланды. Бул тууралуу пьесанын автору - Кыргыз Республикасынын Эл жазуучусу Кайрат Иманалиев билдирди.
Анын айтымында, чыгарма түрк элдеринин эпикалык жомокторунун негизинде жазылган.
Иш-чарага Азербайжандын маданият министри Адиль Керимли, башка жогорку даражалуу расмий адамдар, чыгармачыл чөйрөлөрдүн өкүлдөрү, Түрк маданияты жана мурасы фондунун жана Кыргызстан элчилигинин жетекчилиги жана кызматкерлери катышты.
Спектакль азербайжандык көрүүчүлөрдүн алкоосуна ээ болуп, Азербайжандын Маданият министрлигинин жана театр ишмерлер союзунун, Түрк маданияты жана мурасы фондунун сыйлыктары берилди.
Мындай сыйлыктарга спектаклдин режиссеру маркум Марат Козукеев, КР Эл артисттери Шайгүл Алсеитова, Калича Сейдалиева, Коркуттун образын жараткан Адыл Болорбек уулу менен Атай Өмүрбеков татыктуу болду.
"Коркут Ата" спектакли Т. Абдумомунов атындагы Кыргыз улуттук академиялык драма театрында мындан тогуз жыл мурун коюлуп, сахнадан түшпөй, бир нече эл аралык фестивалдарга катышып, бир топ ийгиликтерди багындырып келген.
Белгилей кетсек, учурда Бишкекте Азербайжандын маданият күндөрү өтүүдө.
