Бишкек, 24.03.26. /Кабар/. Бүгүн, 24-мартта, Жогорку Кеңештин төрагасы Марлен Маматалиев Европадагы коопсуздук жана кызматташтык боюнча уюмунун (ЕККУ) башкы катчысы Феридун Синирлиоглун кабыл алды.
Парламенттен билдиришкендей, төрага азыркы геосаясий кырдаалда ЕККУ менен диалогду кеңейтүү жана Парламенттик ассамблеянын алкагында байланыштарды чыңдоо маанилүү экенин белгиледи.
Марлен Маматалиев акыркы шайлоодо аялдар үчүн атайын квоталар каралганын, натыйжада парламентте 31 айым депутат бар экенин айтты. Бул көрсөткүч боюнча Кыргызстан лидер өлкөлөрдүн катарына киргени өзгөчө белгиленди.
Президент Садыр Жапаровдун демилгеси менен коңшу өлкөлөр жана ЕККУга мүчө мамлекеттер менен бардык багыттарда алакалар өнүгүп жатканы айтылды.
Башкы катчы Феридун Синирлиоглу Кыргызстандын 34 жыл ичиндеги өнүгүүсүн жана демократиялык институттарды чыңдоодогу, өзгөчө гендердик теңчиликти камсыздоодогу аракеттерин жогору баалады.
Тараптар адам укуктары, коопсуздук жана экономика багытындагы долбоорлорду биргелешип ишке ашырууну макулдашты.
