Бишкек, 05.02.25. /Кабар/. Мурдагы тышкы иштер министри, коомдук жана саясий ишмер Аликбек Жекшенкулов “Кабар” маалымат агенттигине берген комментарийинде Кытай менен мамилени чыңдоонун жана өнүктүрүүнүн маанилүүлүгүнө токтолду.
Анын пикиринде, Садыр Жапаров менен Си Цзиньпиндин сүйлөшүүлөрү Кыргызстандын экономикалык гүлдөп-өсүшү үчүн гана эмес, аймактарды ар тараптуу өнүктүрүүнүн контекстинде да маанилүү.
«Кытай биздин жакын кошунабыз жана биздин жалпы чек ара 1000 километрден ашык. Ошондуктан коопсуздук, экономиканы өнүктүрүү маселелери жана эки тарапты тең кызыктырган башка тармактар эбегейсиз мааниге ээ. Ошондуктан, биздин өз ара аракеттенүүнүн перспективалары чоң потенциалга ээ жана биз азыр байкап жаткан бул багыттагы иштердин жүрүшү оң натыйжа берип жатат.
Жаңы жылдан кийин биздин президентибиз Кытайга мамлекеттик сапар менен барганы абдан жакшы көрүнүш. Кытайда учурда белгиленип жаткан майрам жашоонун жаңылануусун жана ойгонушун билдирет. Бул жаңы башталыштар жана жаңы көз караштар.
Учурда дүйнө жүзү боюнча геосаясатта жана экономикада глобалдык өзгөрүүлөр болуп жатат. Мындай туруксуз кырдаалда коңшулар менен достукту, ишенимди жана кызматташтыкты чыңдоо маанилүү. Кытай менен тыгыз кызматташуу бүтүндөй аймактын туруктуулугунун маанилүү фактору болуп саналат. Бул жагынан алганда, Кыргызстандын позициясы прагматикалык жана Кытай менен кызматташуу стратегиялык өнөктөштүк деңгээлине көтөрүлүп, бекемделип жаткандыгы принципиалдуу мааниге ээ. Муну биздин лидерлерибиздин ортосунда Пекинде өткөн диалог ырастап турат.
Биздин экономикалык карым-катнаштарыбыз канчалык тез өнүгүп жатканын, Кытайдан Кыргызстанга кандай олуттуу инвестиция келип жатканын баары билсе керек. Ал эми темир жолду куруунун биринчи багыты өзгөчө мааниге ээ. Ал бир гана бул аймакта эмес, бүткүл Евразия континентинде соода мүмкүнчүлүктөрүн ачат. Бул магистраль бизге деңиздерге чыгууга мүмкүндүк берет, Түштүк-Чыгыш Азия менен Европа өлкөлөрүн жакындатат. “Бир алкак, бир жол” – бул Си Цзиньпин тарабынан сунушталган, глобалдык мааниге ээ жана биздин улуттук кызыкчылыктарыбызга дал келген формула.
Экинчи багыт – жасалма интеллектти өнүктүрүү. Кытай жакында эле бул жаатта өзүнүн мүмкүнчүлүктөрүн көрсөттү. Бул тармак – келечектин тармагы. Биз бул багыт боюнча Пекин жана башка алдыңкылар менен тыгыз иштешүүбүз керек.
Башка маанилүү багыттардын ичинен коммуникацияны жана энергетиканы өнүктүрүү, биринчи кезекте кайра жаралуучу, экологиялык жактан таза булактарга жумшалган инвестицияларды белгилейт элем. Бул жагынан биз абдан пайдалуу техникалык жана гранттык жардамдарды алып жатабыз.
Анан, албетте, Кытай Борбор Азиядагы стабилдүүлүктүн гаранттарынын бири экенин жана ШКУдагы өнөктөш катары, биз бул уюмдун алкагында аймактык коопсуздукту чыңдоо боюнча биргелешип иш алып барып жатканыбызды белгилей кетүү керек», - деп белгилейт Аликбек Жекшенкулов.
