Бишкек, 11.04.25. /Кабар/. Бүгүн жаңы судьялар Нурбек Эсеналиев менен Бакыт Усубалиевди жалпы Жогорку соттун жамаатына тааныштырылды. Бул тууралуу Жогорку соттон билдиришти.
Аларды жамаатка төрага Медербек Сатыевдин катышуусунда президенттин жана министрлер кабинетинин Жогорку Кеңештеги туруктуу өкүлү Алмасбек Абытов жана Жогорку Кеңештин Конституциялык мыйзамдар, мамлекеттик түзүлүш, сот-укук маселелер жана регламенти боюнча комитетинин төрагасынын орун басары Карим Ханджеза тааныштырды.
Белгилүү болгондой, кечээ 2025-жылдын 10-апрелинде, Жогорку Кеңештин жыйынында депутаттар Нурбек Эсеналиев менен Бакыт Усубалиевди Жогорку соттун судьялыгына дайындоого макулдук беришип, судьялар ант беришкен. Жаңы судьялар курагынын чегине жеткенге чейин шайланышты.
Жогорку сотко эки жаңы судьянын дайындалышы менен судьялардын жалпы саны 35ке жетти. Ошентип, өлкөнүн жогорку сот органындагы судьялар корпусу толук курамда болду.
Жаңы судьяларга кесиптик ишмердүүлүгүндө ийгиликтер айтылып, жамаатка жогорку квалификациялуу, компетенттүү жана өз ишине берилген адистер келгендиги кошумчаланды.
