Бишкек, 22.03.25. /Кабар/. Өзгөчө кырдаалдар министрлиги Токой кызматы менен биргеликте Жалал-Абад облусунун Барпы айылында көчөт отургузуу иш-чарасын өткөрдү. Бул тууралуу ведомстводон маалымдашты.
Ага өзгөчө кырдаалдар министри Бообек Ажикеев жана ӨКМдин Жалал-Абад облусундагы кызматкерлери катышты.
Бул иш-чара "Жашыл мурас" улуттук кампаниясынын алкагында өткөрүлүп, өлкө аймагында экологияны коргоо жана жашыл аймактарды көбөйтүү максатын көздөйт. Жалпысынан 100 гектар аянтка 40 миң көчөт, анын ичинде ийне жана жазы жалбырактуу дарактардын жети түрү отургузулат.
Өзгөчө кырдаалдар министрлиги экологиялык туруктуулукту камсыз кылуу жана токой ресурстарын сактоо иштерин мындан ары да улантат.
