Бишкек, 30.03.26. /Кабар/. Зардалыга кичи футбол аянтчасы курулууда. Бул тууралуу облустагы өкүлчүлүктөн билдиришти.
Маалыматка ылайык, облус башчысы Мамыржан Рахимов айылдын социалдык жана инфраструктуралык абалы менен таанышып, Президент Садыр Жапаровдун фондунун эсебинен курулуп жаткан кичи футбол аянтчасын көрүп чыкты.
Эске салсак, 2024-жылдын 29-сентябрында мамлекет башчысы Зардалы айылына барып, тургундар менен жолугушууда айылга электр жарыгын, уюлдук байланышты жеткирүү, жол жана көпүрө куруу маселелерин колдоого алып, тийиштүү жетекчилерге тапшырма берген.
Ага ылайык, айылга электр жарыгы берилди. "Мега" компаниясы аркылуу мобилдук байланыш жана интернет жетти. Сары-Талаа — Кызыл-Таш — Зардалы автожолу пайдаланууга берилди. Жаңыдан курулган жол эскисинен 26 чакырымга кыскарды. Кожешкен дарыясы аркылуу узундугу 30 метр болгон темир көпүрө курулуп, унаа каттамы камсыздалды.
Белгилей кетсек, Зардалы айылы Баткен районунун борборунан 110 чакырым алыстыкта, тоо арасында жайгашкан. 2024-жылга чейин элеттиктер электр жарыгысыз, байланышсыз жашап, жол азабын тартып келишкен.
