Бишкек, 09.08.26. /Кабар/. Күн мурун Ысык-Көл облусунун Тоң районунун түзүлгөндүгүнүн 90 жылдыгына арналган салтанаттуу иш-чара өттү.
Парламенттен билдиришкендей, салтанаттуу иш-чаранын алкагында конокторго Тоң районунун тарыхын, жаратылышын, бүгүнкү жетишкендиктерин жана келечектеги өнүгүү багыттарын камтыган атайын тасма тартууланды.
Ошондой эле район тарыхына арналган театрлаштырылган программа көрсөтүлүп, анда Тоң жергесинин басып өткөн жолу, элинин каада-салты, маданий мурасы жана тарыхый инсандары тууралуу көрсөтүлдү.
Маарекеге Жогорку Кеңештин төрагасы Марлен Маматалиев катышып, өз сөзүндө Тоң району кыргыз элинин руханий дүйнөсүнө, маданиятына жана мамлекеттүүлүгүнө зор салым кошкон залкар инсандарды тарбиялап чыгарган куттуу аймак экенин белгиледи. Тагыраагы Тоң өрөөнүнөн чыккан Тыныбек, Деңизбай, Саякбай, Мамбет, Каба сыяктуу залкар манасчылар “Манас” эпосун сактап, кийинки муундарга жеткирүүгө зор салымын кошконун мисал кылды.
Ошондой эле төрага Тоң жергесинен чыккан көрүнүктүү мамлекеттик жана коомдук ишмерлердин, адабият, маданият, искусство жана спорт өкүлдөрүнүн эмгегине жогору баасын берди.
"Тоң – тарыхы терең, руханий мурасы бай, улуу инсандарды тарбиялап өстүргөн касиеттүү жер. Бул жерден чыккан залкарлардын эмгеги жалпы кыргыз элинин сыймыгы. Алардын өмүр жолу жана калтырган мурасы кийинки муундар үчүн чоң тарбиялык мааниге ээ", — деди Марлен Маматалиев.
Муну менен катар төрага бүгүнкү күндө президент Садыр Жапаровдун жетекчилиги алдында аймактарды өнүктүрүүгө, айылдардын инфраструктурасын жакшыртууга, социалдык объектилерди жаңылоого жана элдин жашоо сапатын жогорулатууга өзгөчө көңүл бурулуп жатканын билдирди.
Тоң районунун 90 жылдык маарекесине арналган салтанат Жогорку Кеңештин депутаты, аталган округдун депутаты Болот Сагынаевдин колдоосу менен уюштурулду. Маарекелик иш-чарага депутаттар Камила Талиева, Максат Алымбеков, Мирлан Жээнчороев, Табылды Муратбеков, Адилет Белеков, Уланбек Жаанбаев, Жаныбек Аматов, Рахат Жунушбаева, Эрулан Кокулов, Азизбек Абдуллаев, жергиликтүү башкаруу органдарынын өкүлдөрү, райондун тургундары, ардактуу коноктор жана коомчулук өкүлдөрү катышты.
