Бишкек, 24.08.26. /Кабар/. Ысык-Көлдүн акваториясында жүргүзүлгөн рейд учурунда узундугу болжол менен 400 метр болгон төрт эски синтетикалык балык уулоочу тор чыгарылды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, рейддик иш-чаралар суу биоресурстарын мыйзамсыз пайдаланууга жол бербөө, браконьерликтин алдын алуу жана Ысык-Көлдүн экологиялык абалын сактоо максатында жүргүзүлүүдө.
Ошондой эле Токтогул суу сактагычында жүргүзүлгөн рейд учурунда узундугу 150 метр болгон синтетикалык балык уулоочу торду аныктап, суу сактагычтан чыгарып, жараксыз абалга келтиришти.
Рейддер президенттин жарлыгын аткаруу максатында мындан ары да үзгүлтүксүз жүргүзүлөт.
