Бишкек, 10.08.26. /Кабар/. Өзгөчө кырдаалдар министри Канатбек Чыныбаев Ысык-Көл облусуна болгон иш сапарында Темир жана Кашат айылдарындагы селден коргоо курулуштарынын жүрүшү менен таанышты.
Ведомстводон маалымдашкандай, Темир айылында узундугу 2 миң 40 метр болгон Арчалуу сел өткөрүүчү канал курулууда. Анын нугуна 11 ички көпүрө курулат. Долбоор аяктаганда 200дөн ашуун турак үй, ички чарбалык жолдор жана Бишкек–Каракол унаа жолунун 600 метрлик тилкеси селден корголот.
Кашат айылында Чоң-Ак-Суу дарыясынын 1 миң метрлик бөлүгүнүн оң жана сол жээктери таш менен бекемделүүдө. Натыйжада турак үйлөр, 5 гектар айдоо аянты, конок үйлөр, эки ишкана, мөмө-дарактар жана Бишкек – Каракол жолунун 200 метрлик тилкеси суу ташкынынан корголот.
