Бишкек, 08.04.26. /Кабар/. Транспорт департаменти айыптардан жана жыйымдардан үч ай ичинде бюджетке 69,3 млн сом түшүрдү. Бул тууралуу Транспорт жана коммуникациялар министрлигинен билдиришти.
Маалыматка ылайык, үч ай ичинде транспорттук көзөмөл пункттары менен станциялык курулмаларда жүргүнчү жана жүк ташуучу 189 миң 396 унаа текшерилди. Транспорттук мыйзамдардын талаптарын бузуу фактылары боюнча 2 609 протокол түзүлүп, 3 млн 562 миң сом айып пул салынган.
Анын ичинен:
- Чектелген салмак-габариттик ченемдерди сактабагандыгы үчүн — 998 протокол (17 млн 465 миң сом айып пул);
- Эл аралык жүк ташуулардын тартибин сактабагандыгы үчүн — 143 протокол (2 млн 860 миң сом айып пул).
Мындан тышкары, ашыкча салмак жүктөп алгандан түшкөн жыйым 2 млн 557 миң сомду, бөлүнгүс ири көлөмдүү жана оор жүктөрдү ташууга атайын уруксат берүүдөн 36 млн 791 миң сомду, көп жолу колдонулуучу атайын уруксат берүүдөн 1 млн 114 миң сомду түздү. Жалпы транспорттук көзөмөл жүргүзүүнүн жыйынтыгында мамлекеттик бюджетке 69 млн 313 миң сом түшкөн.
Белгилей кетсек, Транспорт департаменти 21 транспорттук көзөмөл пунктунда салмак-габариттик көзөмөл жүргүзөт. Ошондой эле транспорттук көзөмөл аракеттери мобилдик топтор аркылуу да ишке ашырылат.
