Бишкек, 23.05.26. /Кабар/. Жогорку Кеңешинин төрагасы Марлен Маматалиев жана ”Элдик“ депутаттык тобунун мүчөлөрү иш сапарынын алкагында Санкт-Петербург шаарындагы кыргызстандык ишкерлер, мигранттар жана студенттер менен жолукту. Бул тууралуу парламент билдирди.
Жолугушууда төрага чет жердеги жарандардын сунуш-талаптары мыйзамдарды өркүндөтүүгө негиз болорун билдирип, мамлекет жетекчилиги миграция маселелерине жана мекендештерди колдоого өзгөчө көңүл буруп жатканын баса белгиледи.
Суроо-жооп форматында өткөн жыйында Россиянын аймагында визасыз жүрүү мөөнөтүн узартуу боюнча ЖК тарабынан Москвада сүйлөшүүлөр жүргөнү айтылды. Учурда жүк ташуучу унаалардын айдоочулары үчүн айрым жеңилдиктер киргизилип, калган багыттар боюнча сунуштар даярдалууда.
Айрым коммерциялык банктарда рублдун курсун жасалма төмөндөтүүгө жол бербөө үчүн Улуттук банктын көзөмөлүн күчөтүү маселеси тармактык комитет тарабынан көзөмөлгө алынары белгиленди.
Ошондой эле жеңилдетилген ипотекалык программаларга катышууда эмгек мигранттарына карата мурда коюлган чектөөлөр толугу менен алынганы маалымдалды.
Мындан тышкары, жарандарга ыкчам көмөк көрсөтүү максатында, жакында Россияда Кыргызстандын Башкы прокуратурасынын өкүлчүлүгү ачылары жана аны каржылоо маселеси чечилгени белгиленди.
