Бишкек, 11.09.26. /Кабар/. Талас облусунун тургундары аймакта болуп жаткан оң өзгөрүүлөрдү белгилеп, жаңы долбоорлордун ишке ашырылып, инфраструктуранын жаңыланып жатканы үчүн Кыргызстандын президенти Садыр Жапаровго жана анын командасына ыраазычылык билдиришти.
Талас шаарынын тургуну Гүлүмкан эже бүгүнкү күндө облуста буга чейин болуп көрбөгөн өзгөрүүлөр болуп жатканын белгиледи.
"Мурда болбогон нерселер болуп жатат. Биз абдан ыраазыбыз. Буга чейин жасалбаган иштер аткарылууда. Мунун баарын көрүп, кубанасың. Элибиз аман-эсен, өлкөбүздө тынчтык болсун. Эми биз чындап эле өз облусубуз менен сыймыктана алабыз", — деди ал.
Дагы бир жергиликтүү тургун Зыйнат Алиеванын айтымында, бүгүнкү күн жалпы Кыргызстан, өзгөчө Талас облусунун эли үчүн өзгөчө күн.
"Бул Кыргызстан эли үчүн, айрыкча Таластын тургундары үчүн өзгөчө күн. Облус өнүгүп, Талас таанылгыс болуп өзгөрүп жатат. Президент Садыр Жапаровго терең ыраазычылык билдиребиз. Өлкөбүздө мындан да көп жакшы окуялар болсун", — деди ал.
Талас районундагы Касымов атындагы орто мектептин директору Сабатар Суюнтбеков Кыргызстандын эгемендүүлүгүнүн 35 жылдыгын Талас облусунда белгилөө аймактын тургундары үчүн чоң сыймык экенин белгиледи.
"Кыргызстандын эгемендүүлүгүнүн 35 жылдыгы Таласта белгиленип жатканы биз үчүн чоң сыймык. Талас облусундагы жакшы өзгөрүүлөрдү көрүп жатабыз, көптөгөн жаңы объектилер ачылууда. Бул дагы президентибиздин өз элине болгон камкордугунун белгилеринин бири. Жүрөгүбүздө патриоттук сезим ар дайым жашасын", — деди ал.
Ал эми Арал айылынын тургуну Зулкарнайн Султанмуратов да жүргүзүлүп жаткан иштер үчүн ыраазычылыгын билдирди.
"Президентке ыраазычылык билдиребиз. 40 жылда жасала турган иштер беш жылда аткарылды. Жети облустун баары гүлдөп, көркүнө чыгып жатат. Мурда мындай болгон эмес. Ал абдан жакшы иштерди жасап жатат, биз муну менен сыймыктанабыз", — деди айыл тургуну.
Белгилей кетсек, Талас облусунда Кыргыз Республикасынын Эгемендүүлүгүнүн 35 жылдыгына арналган иш-чаралар өтүп жатат.
