Бишкек, 12.09.26 /Кабар/. Кыргызстандын Эгемендүүлүгүнүн 35 жылдыгына арналган майрамдык иш-чараларга байланыштуу Талас облусунда медициналык коштоо күчөтүлдү.
Саламаттык сактоо министрлигинен билдиришкендей, медициналык жардам көрсөтүүгө Бишкектен 4, облустан 8 тез жардам бригадасы тартылып, Талас шаарынын борбордук аянтында 3 медициналык пункт уюштурулду.
“11-сентябрга карата медициналык жардам алуу үчүн 220 адам кайрылып, алардын 12си балдар болгон. 16 бейтап кошумча текшерүү үчүн стационарга жөнөтүлгөнү менен, ооруканага жаткырууга муктаждык болгон эмес”, - деп айтылат маалыматта.
Белгиленгендей, кайрылуулардын негизги себептери кан басымдын жогорулашы, эс-учун жоготуу, КРВИ, баш оору, гастроэнтерит жана жаракаттар болду. Жалпысынан 3 жаракат алуу учуру катталып, анын биринде жаран аттан кулап жаракат алган. Медициналык бригадалар иш-чаралар аяктаганга чейин күчөтүлгөн режимде ишин улантууда.
