Бишкек, 11.11.26. /Кабар/. Бишкек – Ош унаа жолунун Төө-Ашуу ашуусунда катуу бороон башталып, айдоочулардын жолду көрүү мүмкүнчүлүгү кескин начарлады. Бул тууралуу Транспорт жана коммуникациялар министрлигинен билдиришти.
Маалыматка ылайык, бороон жолдун 128-130-чакырымдарында катталып, оор жүк ташуучу унаалардын кыймылын кыйындатууда.
"Учурда жолчулар штаттык режимде иштеп жатышат. Аба ырайына байкоо жүргүзүлүп, бороон токтобосо, оор жүк ташуучу унаалардын кыймылына убактылуу чектөө киргизилиши мүмкүн", - деп айтылат маалыматта.
Жол тейлөө кызматкерлери айдоочуларды этият болууга, ылдамдыкты азайтууга жана жол эрежелерин сактоого чакырышты.
