Бишкек, 24.02.25. /Кабар/. Бүгүн Курулуш министрлигинде Сауд өнүктүрүү фондунун өкүлдөрү менен жолугушуу өттү.
Ведомстводон билдиришкендей, жолугушууга курулуш министри Нурдан Орунтаев, Бишкек шаарынын мэри Айбек Жунушалиев жана Чүй облусунун башчысы Канат Жумагазиев катышты.
Жолугушууда мамлекеттик мектептерди куруу долбоорунун экинчи этабын ишке ашырууну баштоо маселелери талкууланды. Сауд өнүктүрүү фондунун өкүлдөрү даярдык иштеринин жүрүшүнө канаттандыраарлык баа берип, долбоорду мындан ары да колдоого даяр экендиктерин билдиришти.
Фаза-2нин алкагында, Сауд өнүктүрүү фондунун каржылоосу менен, Бишкек шаарында беш жаңы мектеп жана жети мектепке кошумча корпус, ал эми Чүй облусунда эки жаңы мектеп куруу пландалууда.
Бул долбоор билим берүү инфраструктурасын өнүктүрүү жана окуучулар үчүн заманбап шарттарды түзүү боюнча маанилүү кадам болуп саналат.
Эскерте кетсек, Фаза-1дин алкагында республика боюнча 28 мектеп жана 2 бала бакча курулган.
