Бишкек, 24.04.25. /Кабар/. Президент Садыр Жапаров бүгүн, 24-апрелде Бишкекте БУУнун Азык-түлүк жана айыл чарба уюмунун (ФАО) башкы директору Цюй Дунъюй менен жолугушуу өткөрдү.
Тараптар Кыргызстан менен ФАО ортосундагы кызматташтыктын учурдагы абалына жана өнүктүрүү перспективаларына байланыштуу маселелердин кеңири чөйрөсүн талкуулашты. Азык-түлүк коопсуздугу, климаттык өзгөрүүлөргө ыңгайлашуу, жер ресурстарын туруктуу башкаруу, ошондой эле агрардык өнөр жай комплексин өнүктүрүү маселелерине өзгөчө көңүл бурулду.
«Айыл чарба жана экологиялык актуалдуу маселелерди чечүүдө ФАОнун көрсөткөн колдоосун жогору баалайбыз жана ыраазычылыгыбызды билдиребиз», - деп айтты мамлекет башчы.
Президент ФАОнун көмөгү менен биздин өлкөдө бир катар маанилүү программалар иштелип чыкканын жана кабыл алынганын белгиледи. Ал ошондой эле азыркы учурда өлкөбүз тарабынан айыл чарба тармагына, азык-түлүк коопсуздугуна жана тамак-аш жаатындагы саясатка өзгөчө көңүл бурулуп жатканын баса белгиледи.
Садыр Жапаров агрокластерлерди өнүктүрүү, жашыл биотехнологияларды, климаттык өзгөрүүлөргө ыңгайлашуу технологияларын, жасалма интеллектти жана айыл чарба өндүрүшүндө жаңы заманбап жабдыктарды колдонууну киргизүү багытында жигердүү иштер жүргүзүлүп жатканын ырастады.
Өз кезегинде БУУнун Азык-түлүк жана айыл чарба уюмунун (ФАО) Башкы директору Цюй Дунъюй президенттин өлкөнү жана айыл чарба тармагын өнүктүрүүгө кошкон салымын өзгөчө белгилеп, Кыргызстандын ыңгайлуу географиялык жайгашуусун жана уникалдуу жаратылыш шарттарын баса көрсөттү.
Цюй Дунъюй Кыргызстандын министрлер кабинети менен ФАОнун ортосунда Кыргызстанда Азык-түлүк жана айыл чарба уюмунун өкүлчүлүгүн түзүү жөнүндө Макулдашууга кол коюлгандыгына канааттангандыгын билдирип, анын кызматташтыкты тереңдетүү жана айыл чарба тармагын туруктуу өнүктүрүү үчүн маанилүүлүгүн белгиледи.
Жыйынтыгында тараптар Кыргызстандын ФАО менен алакасы мындан ары да чыңдалып, өнүгө берерине ишеним билдиришти.
