Бишкек, 03.02.25. /Кабар/. Бүгүн Ош шаарынын мэри Жеңишбек Токторбаев тиешелүү кызматтардын жетекчилери менен бирге Манас-Ата муниципалдык аймактык башкармалыгындагы Раззаков көчөсүнүн абалын текшерди.
Муниципалитеттен билдиришкендей, шаар башчысы жеринде көчөнүн жалпы көрүнүшүн жакшыртуу, анын ичинде тосулуп калган тротуарларды ачуу, мыйзамсыз соода-сатык жайларды, тосмолорду бузуп алып салуу, башаламан соодага тыюу салуу, эскилиги жеткен, өңү өчкөн жарнамалык объектилерди жаңылоо боюнча тапшырмаларды берди.
Мэр ошондой эле аймакты көрктөндүрүүгө жана жашыл аймактар менен сейил бактарды ачууга өзгөчө көңүл буруу керектигин белгиледи.
