Бишкек, 30.01.25. /Кабар/. Жогорку соттун төрагасы Медербек Сатыев Чүй облусунун жергиликтүү сотторунун ишмердүүлүгү менен таанышууда. Бүгүн ал Чүй облусунун административдик сотуна барып, кеңешме өткөрдү.
Жогорку соттон билдиришкендей, кеңешмеде административдик соттун төрагасы Таалайбек Даркимбаев соттун ишмердүүлүгү тууралуу маалымат берди. Тактап айтканда, жүргүзүлгөн административдик-аймактык реформанын негизинде судьялардын жүктөмү көбөйүп, ошондой эле имараттын абалына жана жумушчу кабинеттердин жетишсиздигине байланыштуу көйгөйлөргө көңүл бурулгандыгы белгиленди.
Жогорку соттун төрагасы иштерди кароодо белгиленген мөөнөттөрдүн бузулушуна жол бербөөнү, анын ичинде жер тилкелерин камакка алууга, талаштуу жерлерге жана башка ушул сыяктуу иштерге байланыштуу маселелерди өз убагында кароону тапшырды.
Белгилүү болгондой, мамлекеттик жана муниципалдык кызматкерлердин мыйзамсыз иш-аракеттеринен улам мурда жеке колго өткөрүлгөн участокторду жана жерлерди мамлекетке кайтаруу боюнча бир катар иштер соттордо каралып, чечимдер кабыл алынган.
Медербек Сатыев сот бийлигинин көз карандысыздыгы жөнүндө сөз кылып жатып, адилеттүүлүктү ишке ашырууга кандайдыр бир кийлигишүүгө жана сотторго кысым көрсөтүүгө таптакыр жол берилбестигин баса белгиледи. Мындай кырдаалдар пайда болгон учурда, тиешелүү чараларды көрүү үчүн дароо маалымдоо тапшырмасы берилди.
Мындан тышкары, Сатыев сот тутумунда коррупциялык көрүнүштөргө жол берилбей турганын өзгөчө белгилеп, ар бир сот кызматкери мыйзамдын нормаларын так сактоого милдеттүү экенин эскертти.
Жыйналыштын соңунда ал Чүй облусунун административдик сотунун судьялары менен аппарат кызматкерлери жана Сот департаментинин Чүй облустук башкармалыгынын кызматкерлеринин иштөө шарттары менен таанышты.
