Бишкек, 10.07.26. /Кабар/. Бүгүн Жогорку Кеңештин төрагасы Марлен Маматалиев Б.Ельцин атындагы Кыргыз-Россия Славян университетинин башкаруучу кеңешинин жыйынына катышты.
Парламенттен билдиришкендей, алгач төрага башкаруучу кеңештин мүчөлөрү менен бирге университеттеги заманбап жабдуулар чыгарылган лабораториянын ишмердүүлүгү менен таанышып, Улуу Ата Мекендик согуштагы аталардын эрдигин даңазалаган тарыхый-документалдык көргөзмөнү да көрүп чыкты.
Ал эми жыйындын жүрүшүндө университеттин жалпы ишмердүүлүгүнө жана стратегиялык өнүгүү максаттарына байланышкан маселелер каралып, соңку окуу жылдарынын отчету берилди.
Талкуу маалында Маматалиев университет Кыргызстан менен Россиянын ортосундагы стратегиялык өнөктөштүктүн эң ийгиликтүү билим берүү долбоорлорунун бири экенин белгилеп, акыркы жылдары окуу жайдын жасап жаткан иштерине жогору баасын берди.
Ошону менен катар окутуучуларга жана студенттерге түзүлгөн шарт-жагдайды жакшыртуу жаатындагы сунуштары менен бөлүштү.
Андан тышкары, Ош шаарында окуу жайдын филиалын ачуу тууралуу айтылган демилгени колдоого алып, бул өлкө ичиндеги гана эмес, жалпы Фергана чөлкөмдөгү студенттерди да тартууга өбөлгө түзөрүн кошумчалады.
Ал эми депутат Гуля Кожокулова кечки окуу ыкмасындагы кошумча билим берүү шарттарын түзүү багытындагы демилгелерин айтып, университеттин алдыдагы ишмердүүлүгүнө байланышкан суроолорун узатты.
Жыйындын жыйынтыгында айтылган сунуш-пикирлерди эске алуу тиешелүү чечимдер кабыл алынды.
