Бишкек, 27.04.26. /Кабар/. Курулуш, архитектура жана турак жай-коммуналдык чарба министри Нурдан Орунтаев Талас шаарында ири долбоордун курулуш иштеринин жүрүшүн текшерди.
Ведомстводон маалымдашкандай, текшерүүнүн жүрүшүндө министр "Манас-Ордо" комплексиндеги реконструкция иштери белгиленген графиктен артта калып жатканын белгиледи. Буга байланыштуу тиешелүү жетекчилерге жана курулуш компаниясына расмий эскертүү берилди.
Орунтаев курулуш иштерин тездетүү жана белгиленген мөөнөттөрдү так сактоо зарылдыгын баса белгилеп, 10 күндүн ичинде ишти жандандырып, конкреттүү жыйынтык көрсөтүүнү тапшырды.
Долбоорго ылайык, комплексте административдик борбор, 300 орундуу конгресс-холл, улуттук стилде жасалган коттедждер, жайкы жана кышкы ашканалар, ошондой эле салтанаттуу иш-чараларды өткөрүүгө арналган борборлор курулууда. Мындан тышкары, коноктор үчүн соода жана эс алуу аймагын камтыган галерея жана 3500 орундуу маданий иш-чаралар борбору каралган.
Комплекстин жалпы аянты 225 гектарды түзөт. Жаңы долбоордун алкагында музей имаратынын аянты 450 чарчы метрден 1500 чарчы метрге чейин кеңейтилет. Анда кыргыз элинин улуттук өзгөчөлүктөрү заманбап ыкмада, улуттук стиль менен айкалыштырылып чагылдырылат.
Белгилей кетсек, аталган комплекс акыркы 30 жыл ичинде биринчи жолу ири масштабдагы реконструкциядан өтүүдө. Объектинин долбоору министрликке караштуу Шаар куруу жана архитектура департаменти тарабынан иштелип чыкты.
